K-pop оддын аялан тоглолтууд дэлхийн орлогын рейтингийг тэргүүлэв

K-pop урлаг дэлхийн хөгжмийн зах зээлд асар хурдтай өсөж, 2025 онд дахин шинэ түүх бичлээ. Billboard 12-р сарын 10-нд 2025 оны хамгийн өндөр орлоготой тоглолтуудын тайланг зарласан бөгөөд уг жагсаалтад K-pop-ийн дөрвөн том төлөөлөл

Stray Kids,

SEVENTEEN,

BTS-ийн j-hope,

ENHYPEN амжилттай багтсан нь тус салбарын нөлөө улам хүчирхэг болсныг бататгалаа.

Энэ жилийн тайланд 2024 оны 10-р сарын 1-нээс 2025 оны 9-р сарын 30 хүртэл дэлхийн өнцөг булан бүрт болсон тоглолтуудыг хамруулж, орлогыг ам.долларт хөрвүүлэн үнэлжээ.

Stray Kids — №10 байр: 185.7 сая ам.долларын орлого

Stray Kids өөрсдийн “dominATE” дэлхийн аялан тоглолтоор 31 шоу тоглосон бөгөөд нийт 1.3 сая үзэгч татаж, 185.7 сая ам.долларын орлого олсноор жагсаалтын эхний 10-т багтлаа. Энэ нь тэднийг 2025 оны K-pop-ийн хамгийн өндөр орлого олсон хамтлаг болгов.

SEVENTEEN — №17 байр: 142.4 сая ам.долларын орлого

SEVENTEEN “RIGHT HERE” болон “NEW” хос аялан тоглолтоороо дэлхийн тайзнаа хүчин чадлаа дахин харууллаа. Тэд 34 шоугаар 964,000 үзэгч хамруулж, 142.4 сая ам.долларын орлого олсноор №17 байрт шалгарчээ.

j-hope — №32 байр: 79.9 сая ам.долларын орлого

BTS-ийн гишүүн j-hope бие даасан артистын хувиараа “HOPE ON THE STAGE” аялан тоглолтоор 33 шоу хийж, 504,000 үзэгч, 79.9 сая ам.долларын амжилттай орлогоор №32-т жагсав. Энэ нь K-pop-ийн соло артистуудын хувьд маш өндөр үзүүлэлт юм.

ENHYPEN — №37 байр: 76.1 сая ам.долларын орлого

ENHYPEN дэлхийн “WALK THE LINE” аялан тоглолтоор 25 шоу хийж, 556,000 үзэгч, 76.1 сая ам.долларын орлого олж, жагсаалтын №37-т багтсан байна. Тэдний өсөн нэмэгдэж буй олон улсын нөлөө энэ амжилтаар улам тодорчээ.

K-pop дэлхийн хөгжмийн салбарт хүч түрэн гарч ирсээр

Эдгээр дөрвөн уран бүтээлчийн амжилт K-pop зөвхөн стримингийн жагсаалтыг төдийгүй, өндөр орлоготой дэлхийн тоглолтын зах зээлийг ч давамгайлж чаддагийн тод жишээ юм.

Stray Kids, SEVENTEEN, j-hope болон ENHYPEN-ийн тоглолтуудын амжилт K-pop-ийн глобал байр суурийг бэхжүүлж, олон улсын хөгжмийн салбар дахь Солонгос уран бүтээлчдийн нөлөөг улам баттай болгов.