Prada Энэтхэгийн уламжлалт гутлаас сэдэвлэсэн шаахайг албан ёсоор Энэтхэгт үйлдвэрлэнэ

Италийн тансаг зэрэглэлийн брэнд Prada Энэтхэгийн уламжлалт гутлаас сэдэвлэсэн шаахайг албан ёсоор Энэтхэгт үйлдвэрлэхээр болсноо мэдэгдлээ. Энэхүү шийдвэр нь соёлын appropriаци (өөр соёлыг зөвшөөрөлгүй ашигласан) гэх шүүмжлэлд өртсөний дараа гаргасан бодит алхам бөгөөд орон нутгийн гар урчуудтай хамтран ажиллах урт хугацааны хамтын ажиллагааны эхлэл болж байна.

Тус шаахай нь 12-р зуунаас улбаатай Колхапури чаппал хэмээх Энэтхэгийн уламжлалт гутлаас сэдэвлэсэн загвартай бөгөөд хязгаарлагдмал тоогоор үйлдвэрлэгдэнэ. Нэг хосыг ойролцоогоор 800 евро буюу 930 ам.доллароор худалдаалахаар төлөвлөж байгаа бөгөөд цуглуулга 2026 оны хоёрдугаар сард дэлхий даяарх 40 Prada дэлгүүр болон онлайнаар худалдаанд гарна.

Prada нь Энэтхэгийн Махараштра болон Карнатака мужуудад үйл ажиллагаа явуулдаг төрийн дэмжлэгтэй Sant Rohidas Leather Industries and Charmakar Development Corporation (LIDCOM) болон Dr Babu Jagjivan Ram Leather Industries Development Corporation (LIDKAR) байгууллагуудтай хамтран нийт 2,000 хос шаахай үйлдвэрлэхээр төлөвлөжээ. Үйлдвэрлэлд уламжлалт гар урлалыг Италийн технологи, чанарын стандарттай хослуулах юм.

Компанийн маркетинг болон нийгмийн хариуцлагын асуудал хариуцсан захирал Лоренцо Бертелли “Бид анхны үйлдвэрлэгчдийн ур чадварыг өөрсдийн үйлдвэрлэлийн туршлагатай уялдуулж, Энэтхэгийн гар урлалыг дэлхийд таниулахыг зорьж байна” хэмээн онцолсон байна.

Энэхүү хамтын ажиллагаа нь гурван жилийн хугацаанд үргэлжлэх бөгөөд орон нутгийн гар урчуудыг сургах хөтөлбөр хэрэгжинэ. Үүнд Энэтхэг дэх сургалтуудаас гадна зарим урчуудыг Италид байрлах Prada Академид богино хугацаанд дадлагажуулах боломж багтжээ. Мөн гар урчуудыг шударгаар цалинжуулж, төслийн хүрээнд хэдэн сая еврогийн хөрөнгө оруулалт хийхээр төлөвлөсөн байна.

Колхапури чаппал нь ихэвчлэн нийгмийн эмзэг бүлгийн хүмүүсийн урладаг уламжлалт бүтээгдэхүүн бөгөөд эрэлт буурснаас болж устах эрсдэлтэйд тооцогдож ирсэн. Харин Prada-тай хамтарснаар уг гар урлалын үнэлэмж өсөж, орлого нэмэгдэхийн зэрэгцээ залуу үеийг энэ мэргэжилд татах боломж бүрдэнэ гэж гар урчууд үзэж байна.

Prada одоогоор Энэтхэгт хувцасны дэлгүүр нээх эсвэл үйлдвэр байгуулах төлөвлөгөөгүй ч ирэх 3–5 жилийн хугацаанд зах зээлд илүү идэвхтэй оролцох боломжтойг компанийн удирдлагууд дурдсан байна. Судалгаагаар Энэтхэгийн тансаг хэрэглээний зах зээл 2030 он гэхэд 30 тэрбум ам.долларт хүрэх төлөвтэй байгаа нь тус улсыг тансаг брэндүүдийн ирээдүйн чухал зах зээл болгож байна.

Ингэснээр Prada шүүмжлэлийг зүгээр нэг тайлбар төдийхнөөр үлдээх бус, соёлын өвийг хүндэтгэх, орон нутгийн гар урчуудтай бодитой хамтран ажиллах алхам болгон хэрэгжүүлж буйгаа харуулж байна.