Кейт Уинслет: Жин хасах эм, тарианы хэрэглээ хэтэрч буй нь үнэхээр аймшигтай
Холливудын нэрт жүжигчин Кейт Уинслет жин хасах зориулалттай эм, тариа өргөнөөр хэрэглэгдэх болсон тухай санаа зовниж буйгаа илэрхийлжээ. Сүүлийн жилүүдэд Ozempic зэрэг тураах үйлчилгээтэй эмийн хэрэглээ огцом нэмэгдсэн нь зөвхөн Холливуд төдийгүй олон нийтийн дунд түгээмэл үзэгдэл болсон. Тэгвэл Уинслет энэ үзэгдлийг “аймшигтай хөгжил” хэмээн нэрлэв.
Тэрээр ярилцлагадаа:
“Жингээ хасах эм хэрэглэж буй хүмүүсийн тоо ийм их болсон нь үнэхээр аймшигтай. Тэд бие рүүгээ яг юу хийж байгаагаа мэддэг болов уу?” хэмээн хэлж, эрүүл мэндийн эрсдэлийг үл тоомсорлон түргэн үр дүн хөөх хандлагад санаа зовниж буйгаа илэрхийлсэн байна.
Хэт хурдан турах нь эрүүл мэндэд эрсдэлтэй
Уинслетийн үзэж байгаагаар хүмүүс гоо сайхны “шуурхай шийдэл”-д хэт итгэж, эрүүл мэндийн талаар бодолцохоо больжээ. Эдгээр эм, тариа нь анх чихрийн шижин зэрэг тодорхой өвчний эмчилгээнд зориулагдсан байсан ч одоо олон хүн жин хасах зорилгоор зөвлөгөөгүйгээр хэрэглэж буй нь түүнд ихээхэн түгшүүр төрүүлж байгаа аж.
Холливудад түгээмэл үзэгдэл болсон нь
Сүүлийн үед олон алдартнууд тураах эм хэрэглэдэг тухай цуурхал байнга гарч, зарим нь өөрсдөө ч ил тод хүлээн зөвшөөрдөг болсон. Уинслет энэ үзэгдлийг шүүмжилж, алдартнууд болон нөлөөлөгчид олон нийтийн эрүүл мэндэд нөлөөлөхүйц загвар тогтоож байгааг онцолсон.
“Бие махбоддоо хүндэтгэлтэй хандах хэрэгтэй”
Жүжигчин бүсгүйн хэлснээр хүн өөрийгөө хайрлах, эрүүл хооллох, хөдөлгөөнтэй байх нь жин хасах эмээс хамаагүй аюулгүй бөгөөд байгалийн арга. Тэрээр хүмүүсээс эрүүл мэндийнхээ төлөө бодитой сонголт хийхийг уриалсан байна.
Сэтгэгдэл ачаалж байна...