Хүн заавал 8 цаг унтах албагүй:

Орчин үеийн завгүй амьдралд өдөр бүр бүрэн 8 цаг унтах боломж хүн бүрт байдаггүй. Ажлын ачаалал их, амралтын өдрүүд ойртон ирэхэд унтах цаг улам багасдаг нь нууц биш. Насанд хүрэгчдэд 7–9 цаг нойр авахыг зөвлөдөг ч энэ тоо бүх хүнд ижил үйлчлэхгүй бөгөөд нас ахих тусам хүний нойрны хэрэгцээ өөрчлөгдөж байдаг.

Судалгаагаар 7 цагаас бага унтах нь таргалалт, цусны даралт ихсэх, зүрх судасны өвчин болон бусад эрүүл мэндийн хүндрэлтэй холбоотой болохыг олон удаа тогтоосон. Харин 5 цаг эсвэл түүнээс бага унтах зуршил нь архаг өвчин тусах эрсдэлийг эрс нэмэгдүүлдэг.

Тоон үзүүлэлт бус нойрын чанар хамгийн чухал

Бостоны Нойр болон Тархины Судалгааны төвийн захирал, клиникийн сэтгэл судлаач Тони Каннингхамын хэлснээр, хүмүүс “хэдэн цаг унтсан бэ” гэдэгт л хэт анхаарч, “хэр чанартай унтсан бэ” гэдэг гол зүйлээ орхигдуулдаг. Тэрээр нойрын чанарт нөлөөлдөг хоёр үндсэн хүчин зүйл байдгийг онцолжээ: унтах даралт болон циркад ритм.

Унтах даралт нь бид сэрүүн байх хугацаанд нэмэгдэж, унтах үед буурдаг байгалийн цикл юм. “Хоол идээгүй удвал өлсдөг шиг, удаан сэрүүн байх тусам унтах хүслээ илүү мэдэрдэг” хэмээн Каннингхам тайлбарлав.

Харин циркад ритм нь биеийн дотоод цаг бөгөөд гэрэл, дуу чимээ гэх мэт орчны нөлөөнд өртдөг ч үндсэндээ тархины зохицуулалтаар ажилладаг. Шөнө дунд сэрэх мэдрэмж өгдөг нь ч энэ ритмийн илрэл. Чанартай нойр авахын тулд эдгээр хоёр хүчин зүйл бие биедээ нийцсэн байх шаардлагатай.

Хуваарь тогтмол байх нь орондоо эрт орохоос илүү үр дүнтэй

Каннингхамын санал болгох хамгийн үр дүнтэй зөвлөгөө бол өдөр бүр ижил цагт босох. Энэ нь орондоо орох цагийг зохицуулахад илүү хүчтэй нөлөөтэй аж. Мөн унтах бэлэн бус байхад орондоо хүчээр хэвтэх нь огт ашиггүй. Бие өөрийн хэмнэлд орох үед жинхэнэ унтах цаг тань бүрэлддэг.

Өөрийн тохирох нойрны хугацааг хэрхэн олох вэ?

Тэрээр дараах хоёр алхмаар өөрийн “жинхэнэ нойрны хэмнэл”-ийг тодорхойлохыг зөвлөжээ.

1. Тогтмол цагт орондоо орж, 20–30 минутын дотор унтдаг байх.
   Хэрэв унтаж чадахгүй бол тайван орчныг бүрдүүлж, гэрэл бүдгэрүүлэх, бясалгал хийх зэрэг амраах үйлдлүүд хийнэ.
2. Сэрүүлэггүй, цаг харах боломжгүй орчинд, бие өөрөө сэртэл унтах.
   Эхний хэдэн өдөр илүү удаан унтаж магадгүй, гэхдээ энэ нь биеийн нөхөн сэргээлтийн үйл явц.

3–4 өдөр дараалан нэг цагт сэрж эхэлбэл энэ нь таны биеийн хамгийн тохиромжтой унтах хугацаа юм.

Нойр бол зөвхөн цифрээр хэмжигдэх зүйл биш. 8 цаг унтахгүй бол муу гэсэн ойлголт бүх хүнд тохирохгүй. Харин нойрны чанар, тогтмол хуваарь, биеийн дотоод ритмтэйгээ нийцсэн хэв маяг зэрэг нь эрүүл унтахын жинхэнэ үндэс юм.