Фрэнк Дарабонт “Stranger Things 5”-д оролцохын тулд тэтгэвэрээсээ гарчээ

Домогт найруулагч Фрэнк Дарабонт Netflix-ийн хит цуврал “Stranger Things”-ийн тав дахь, сүүлчийн улиралд оролцохын тулд тэтгэвэрээ орхин гарсан тухайгаа хуваалцжээ. The Shawshank Redemption, The Green Mile, The Mist зэрэг кинонуудаараа дэлхий даяар танигдсан тэрбээр найруулагчийн ажлаас 2013 онд Mob City цувралын нэг ангийг хийсний дараа бүрэн хөндийрсөн юм.

Тэр үед Дарабонт эхнэрийн хамт Калифорни мужийн Төв эрэг рүү нүүж, олон арван жил үргэлжилсэн амжилттай уран бүтээлийнхээ дараах тайван амьдралыг эхлүүлсэн байна. Харин тэтгэвэрт гарснаас хойш бараг арван жилийн дараа түүний агент холбогдож, “Stranger Things”-ийн бүтээгчид болох Мэтт, Росс Даффер нар түүний уран бүтээлийн үнэнч шүтэн бишрэгчид гэдгийг дуулгажээ.

Сонирхолтой нь, Дарабонт болон түүний эхнэр өөрсдөө ч мөн “Stranger Things”-ийн томоохон фенүүд байсан бөгөөд эхний дөрвөн улирлыг хэд хэдэн удаа үзсэн гэдгээ ярьсан байна. Ийнхүү тэд уулзаж, цувралын тав дахь буюу төгсгөлийн улирлын талаар ярилцжээ.

Анх тав дахь улирлын хоёр ангийг найруулах ёстой байсан найруулагч Дэн Трахтенберг дараагийн уран бүтээлийнхээ (Predator: Badlands) зураг авалтын хуваарьтай давхацсанаар төслөөс гарах шаардлагатай болсон байна. Үүний дараа Даффер ах дүүс Фрэнк Дарабонтод санал тавьж, тэрээр долоо хоногийн турш бодсоны эцэст тэтгэвэрээсээ гарч, багт нэгдэх шийдвэр гаргажээ.

Одоо 66 настай Дарабонт “Stranger Things 5”-ын 3 болон 5-р ангийг найруулсан байна. “The Turnbow Trap” нэртэй 3-р анги 11-р сарын 26-нд эхний багцын хүрээнд цацагдсан бол “Shock Jock” нэртэй 5-р анги 12-р сарын 25-нд гарч, хоёр дахь багцыг эхлүүлэх аж. Харин цувралын төгсгөлийн ангиуд 12-р сарын 31-нд Netflix болон зарим кино театруудаар зэрэг хүрэх юм.

Тэрээр нэгэн ярилцлагадаа Дарабонт 12 гаруй жилийн дараа дахин найруулагчийн суудалд суусан туршлагаа дурсахдаа:
“Эцэст нь хэлэхэд энэ бол үнэхээр гайхалтай туршлага болсон” хэмээн онцолжээ.

Тэрээр орчин үеийн кино үйлдвэрлэл дэх дижитал технологийн асар хурдтай хөгжлийг сайшааж, мөн “Stranger Things”-ийн багийн уур амьсгал, Даффер ах дүүсийн бүрдүүлсэн туршлагатай хамт олныг өндөр үнэлсэн байна. Багийн олон гишүүн эхний улирлаас хойш хамтран ажиллаж ирсэн нь ажлын чанарт эерэгээр нөлөөлдөг гэдгийг тэр дурджээ.

Жүжигчидтэй ажиллах арга барилынхаа талаар Дарабонт итгэлцэл хамгийн чухал гэдгийг онцлон, туршлагатай жүжигчдэд хэт их заавар шаардлагагүй байдгийг хэлсэн байна. Тэрээр The Shawshank Redemption кинон дээр ажиллаж байхдаа сурсан нэгэн чухал сургамжаа дурдан, зарим үед жүжигчдэд орон зай үлдээх нь хамгийн зөв шийдэл болдгийг онцолсон юм.

Цаашид дахин найруулах эсэх тухай асуултад тэрээр:
“Би тэтгэвэртээ дуртай хэвээр. Гэхдээ зөв орчин, сонирхолтой материал байвал дахин ажиллах боломжийг үгүйсгэхгүй” хэмээн хариулжээ.

Эцэст нь тэр “Stranger Things”-ийг өөрийн уран бүтээлийн замнал дахь онцгой боломж байсан гэж тодорхойлоод:
“Маш олон хүн хайрладаг гайхамшигтай бүтээлийн өчүүхэн хэсэг нь болох боломж надад олдсон” хэмээн нэмж хэлсэн байна.

Харин 5-р ангид юу хүлээж болох талаар, спойлер задлахгүйгээр:
“Жанртай холбоотой маш сонирхолтой үйл явдлууд өрнөнө. Сайн жүжиглэлт, мартагдашгүй мөчүүдийг үзэх болно” гэж товчхон дурджээ.