Марая Кэри “Милан–Кортинa 2026” Өвлийн Олимпийн нээлтийн ёслолын тайзнаа гялалзана

Дэлхийн хэмжээний поп, R&B хөгжмийн домог Mariah Carey “Милан–Кортинa 2026” Өвлийн Олимпийн наадмын нээлтийн ёслолын гол тайзны уран бүтээлчээр оролцохоор албан ёсоор батлагдлаа. Тэрбээр 2026 оны хоёрдугаар сарын 6-нд Италийн Милан хотын San Siro Олимпийн цэнгэлдэхэд дэлхий нийтийн анхаарлын төвд тайзнаа гарах юм.

Таван удаагийн Grammy шагналт Mariah Carey нь One Sweet Day, We Belong Together, All I Want For Christmas Is You зэрэг дэлхийн хит дуунуудаараа хэдийнэ хөгжмийн түүхэнд нэрээ мөнхөлсөн уран бүтээлч билээ. Түүний хоолойн цар хүрээ, тайзны хүчирхэг илэрхийлэл нь Олимпийн нээлтийн ёслолын сүр жавхлантай уур амьсгалтай төгс зохицно хэмээн зохион байгуулагчид онцолжээ.

Томоохон спортын тайзанд туршлагатай уран бүтээлч

Mariah Carey нь спортын томоохон арга хэмжээнд оролцож байсан арвин туршлагатай. Тэрбээр 2002 онд NFL Super Bowl-ийн өмнө АНУ-ын төрийн дуулал The Star-Spangled Banner-ыг дуулж, 2003 онд NBA All-Star тоглолтод оролцсон билээ. Мөн 2020 онд АНУ-ын нээлттэй теннисний тэмцээний эмэгтэйчүүдийн финалын өмнө Save the Day дуугаа анх удаа тайзнаа хүргэж, Naomi Osaka, Venus болон Serena Williams нарын оролцсон түүхэн тоглолтыг чимж байв.

Эдгээр туршлага нь түүнийг дэлхийн хэмжээний спортын баяр ёслолд тохирсон, үзэгчдийг нэгтгэх хүчтэй уран бүтээлч гэдгийг баталсаар ирсэн.

Олимпийн тайз ба хөгжмийн домгуудын мөр

“Милан–Кортинa 2026” Өвлийн Олимпийн нээлтийн ёслолд оролцох нь Mariah Carey-гийн карьерын бас нэгэн онцлох мөч болж байна. Тэрбээр өмнөх Олимпийн наадмуудад гол тайзны уран бүтээлчээр оролцож байсан Celine Dion, Lady Gaga зэрэг дэлхийн оддын мөрийг үргэлжлүүлж буй нь спорт, урлагийн огтлолцол хэр үнэ цэнэтэйг дахин харуулж байна.

“Harmony” буюу Эв нэгдлийн мессеж

Нээлтийн ёслолын үндсэн сэдэв болох Harmony (“Эв нэгдэл”) нь улс үндэстэн, хил хязгаарыг даван хүн төрөлхтнийг нэгтгэх утгыг илэрхийлнэ. Ёслолын ерөнхий найруулагчаар Marco Balich ажиллаж, Италийн соёл, шинэ санаа, сэтгэл хөдлөлийг дэлхийн алдартай уран бүтээлчдийн тоглолтоор дамжуулан харуулах аж.

Онцлох нэгэн шинэчлэл нь тамирчид зөвхөн Милан хотод бус Кортинa, Валтеллина, Вал ди Фьемме зэрэг бүс нутгаас оролцох боломжтой болж, ёслолын цар хүрээг тэлж буй явдал юм. Энэ нь Олимпийн наадмын эв нэгдэл, хамтын ажиллагааны мессежийг илүү өргөн утгаар илэрхийлэх зорилготой.